1Ti 2 | MEU | STEP | Taunabunai, egu hahealo gini-gunana binai: noinoi bona ḡuriḡuri be Dirava igamena bona ihanamolaina ba kara, taunimanima daidiai,

1 Timothy 2

Ḡuriḡuri herevadia

1 Taunabunai, egu hahealo gini-gunana binai: noinoi bona ḡuriḡuri be Dirava igamena bona ihanamolaina ba kara, taunimanima daidiai, 2 bona hanua pavapavadia bona lohiadia danu daidiai. Unu amo Dirava ibadinana bona imatauraina lalodiai baita noho namonamo mai mainoda ida. 3 Una be namo, Ihamaurida Diravana ihamoalena; 4 badina be ia na e uramu taunimanima iboudiai bae mauri bona hereva momokani bae diba. 5 Badina be Dirava na tamona; bona herohemaino tauna danu tamona, Dirava bona taunimanima padadiai, tauna be Keriso Iesu. 6 Ia sibona ena mauri e heni, taunimanima iboudiai idavalaidia, ihamomokanina na nega korikori ai e hedinarai. 7 Una dainai haroro tauna bona aposetolo tauna e gwauraigu; na hereva momokanimu, asina koikoimu. Bona idau bese taudia edia hahediba tauna ai e halaogu, kamonai ai bona hereva momokani ai baina hadibadia.

8 Taunabunai, lau na uramu gabu iboudiai tatau bae ḡuriḡuri, ima helaḡadia bae dudui isi; basie badu bona basie hepapahuahu. 9 Hahine danu dava maraḡi dabuadia bae hahedokilai, mai manaudia bona mai hematauraidia ida. Huidia basie pani, goldeiava aḡeva mai hairaidia basie heralai, dava bada dabuadia danu basie doki. 10 A kara namo mo bae heralai: una na maoro, Dirava imatauraina e gwaurai hamatamu hahinedia ediai. 11 Hahine na lalo-parara baine tahua, asi reḡereḡena, mai lalo-manauna ida. 12 Hahine na na gwaua tubumu, basine hahediba, bona tau basine gunalaia; ia na asi reḡereḡena baine noho. 13 Badina be Adam e karaia guna, Heva be gabeai. 14 Adam danu se koia; hahine hari e koia, bena kara havara ese e butua tao. 15 A natuna iabina ai mauri baine davaria, kamonai bona lalokau bona kara helaḡa baine badina mai lalo-pararana ida negana ai.